老細，你可唔可以唔好扮失憶呀?!

作者: Master Loop

相信好多打工仔都唔會否認大部份老細都係失憶嘅，老細對於自己講過咩幾乎係完全無印象，甚至乎話無講過，做細嘅有時真係好無奈。

我老細有個街知巷聞的特性，就係永遠唔覆email 同講過唔算數的缺德行為，穫穫對質都話無講過，是關佢咩決策都唔會有black and white，好一招死無對證。話說有一次，隔離條team終於搵得返之前老細出過嘅email，可以證明個decision 係受人指使，於是個同事好快手咁print哂D email 出嚟，然後衝咗入CEO間房，轉個頭，CEO走出嚟叫哂所有入 meeting room，話要當住大家面打電話比我老細問過明白。

大家諗住今次仲唔有好戲睇，電話通咗之後，CEO大致交待吓點解要咁急打呢個電話而唔等佢返到公司先傾，正式入正題喇，CEO問點解會有個咁嘅決定，我老細當然九秒九話無咁吩附過，但CEO話有black and white嘅email，仲當眾讀出嚟，我老細竟然話「我諗佢地英文唔好，誤會咗我意思，佢哋全部都曲解咗我個email囉」，嘩，真係咁都噏得出，個同事想嘗試confront我老細之際，CEO竟然話「係喇，我睇清楚個email喇，係你地誤會咗個意思，連我都比你地錯誤引導咗㖭，哈哈哈，大家可以出返去做喇」。

過咗大約15分鐘，大家都收到CEO 個email，內容大致話個同事英文唔好誤會咗人地個email，重申我老細由頭到尾都無做錯，嗰刻大家只可以無言。大家唔好以為CEO係男人，佢同我老細一樣都係一個C9 ，只不過你真係好難想像到CEO包疪佢嘅程度係可以咁令人髮指，唉。

歧視之旅

作者: Master Loop

唔知大家仲記唔記得Emma個故事，自從Emma辭咗職之後，基本上老細已經當佢透明，某程度上都未必係一件壞事，都係自己做自己嘢。當Emma 靜靜地喺公司倒數的階段，老細喺佢last day 前個令星期又叫咗佢入房話要Emma 一條友搬去business centre 坐，Emma 問仲有一星期點解公司要咁安排，老細話你坐緊個位要比第二個人坐，Emma 反問公司仲有咁多吉位都可以坐，點解一定要搬我走呢， 佢老細只拋下一句「呢個係HR」嘅安排，仲要明天即時生效，Emma話仲有好多嘢喺公司未執，老細叫佢坐咗過去再返嚟執。

坐business center，有冇返工其實都 check 唔到，如果你想蛇皇的確係一個唔錯嘅選擇，但正正因為冇同事做証人，又無公司door card 嘅記錄，Emma 更加唔想搬過去，因為費事比老細老屈佢曠工，佢呢個自保的方法係啱嘅，因為佢老細實在太賤同太狗，玩嘢起上嚟，真係乜都做得出。但呢個並唔係Emma 拒絕迫遷嘅理由，因為老細實唔會理。Emma 打比我呻咗一輪，我建議佢用以下幾點同老細講：

1. Emma 係唯一一個需要被調走嘅員工，宜佢同其他唔使調走的同事最大分別就係有疾病，公司有機會觸犯殘疾歧視條例
2. Business center 嗰邊個洗手間距離比起現時office比較遠，對於Emma嚟講唔係太適合，有機會令傷患加深
3. 公司勞工保險究竟有無包呢個Business Center，有事有無勞保賠

 Emma同佢老細講咗以上的concern，老細話咁嘅情況叫Emma唔好搬喇，繼續坐到last day 就算，仲扮好人話一早都同HR講過話唔好，係佢地死都唔制，唉。

所以話呢，打工幾時都要了解吓自己的權利，平時仲打緊份工當然唔可以去到咁盡，但家吓人哋都辭咗職，好心就真係唔好咁賤搞人啦。

去完厠所唔洗手

作者：Master Loop

細細個返學讀書都有教人去完廁所要洗手，但穫穫見到D友去完大小二便都唔洗手，仲要係喺公司，你唔理個人衛生我唔理，最慘係跟著你後面出去，你掂過嘅地方又唔邊度夠膽再掂，諗起都核突啦，有菌㗎嘛大佬。

你唔好以為麻甩佬先會咁，週時聽D friend 講女廁都係一樣，講真，去廁所唔洗手呢家嘢，生得幾靚都冇用，諗起咩胃口都冇哂。

你隻手要嚟做咩呢?

作者 :Master Loop

平時出入門口，唔知大家有無發現有D友嘅攝功真係好勁，到門得返條門隙都可以攝住入，目的只係為咗慳返D力唔去推門，但好多時佢地為咗咁，撞到人都唔使理，有D仲離譜，等人開埋門比佢攝，男又係咁女嘅又咁。

其實上天比你四肢健全咁生活，你就好似跛咁，不如你斬唒D手手腳腳將自己放入個缸到住咪得囉，反正你都唔用。

CEO birthday party

作者 :Master Loop

臨近放工HR出咗個email invitation，話CEO 生日，邀請大家幫佢慶祝，個party 半個鐘，lunch time，既然大老闆birthday party，大家豈敢唔去。

HR出完個invitation 之後，好快又出咗個email，叫大家夾錢買蛋糕、夾下個rundown 幾時唱生日歌同齊心講聲生日快樂，大家睇到呢到真係想噴飯，咁都得？！但係，冇得揀....

如是者到咗當日，HR準備花、生日蛋糕、食物、香檳同大家簽咗名加一句唔可以唔寫的祝福語的大大張生日卡，當然全部係我地夾錢。HR一聲令下，大家齊齊高歌生日歌，半個鐘的生日party就咁完咗。

真心講，擦鞋嘅嘢真係間間公司都有，但呢穫真係極品，如果大老闆係得民心，根本唔使做呢D咁無聊嘅嘢大家都會同老細講句生日快樂，使乜好似北韓咁迫人做，真係多舊魚。

病假要影相證明?!

作者: Master Loop

一早收到同事通知，話尋晚踢波抝柴今日返唔到公，通常呢D case，覆聲同事Ok 叫聲佢保重就算。

返到公司出個email 通知大家同事病咗返唔到工，老細一睇完叫咗我入房，問我有冇問同事攞張相，我話咩相。老細話同事拗柴要影張相證明佢係拗柴，唔係講就得，我話有醫生紙咪得，點可以叫同事影相，嚴重侵犯私隠喎，我就唔會問，你自己可以堅持做。

過咗一陣，老細走去我度show 張相比我睇，我望一望係隻包咗沙布嘅腳，原來條八婆真係問同事攞幅相，老細仲同我講：「點會侵犯私隱吖，同事一問就比，做management 唔可以咁畏首畏尾」。我心諗同事費事煩先影比你，你以為做management 真係可以為所欲為咩，低B。

帶headphone啦唔該！

作者 :Master Loop

香港地D人都好得意，中意打機、睇片唔戴headphone，仲要開到個speaker 大大聲，大人係咁，佢教D細路都係咁Q樣，其實買個headphone 幾錢呀，可唔可以比D公德心呢？！

一早搭巴士返工，個個諗住瞓吓抖吓，你就要全部人陪你睇劇集，去到cafe，想安安靜靜食餐飯傾吓計，你隔離條靚仔就喺度睇卡通片，生個仔又唔湊，淨係比部ipad佢睇片，唔計嘈到人都對條靚仔唔健康啦，但係D港爸港媽實話公眾場所唔用headphone 都唔關人事，掉返轉你試吓我開條片睇女，就算唔係三級色情片都會有人道德判官上身小我，話教壞細路呀、影響社會風氣咁，所以，唒氣，呢D自私嘅行為係唔會有改善，無進步！