去完厠所唔洗手

作者：Master Loop

細細個返學讀書都有教人去完廁所要洗手，但穫穫見到D友去完大小二便都唔洗手，仲要係喺公司，你唔理個人衛生我唔理，最慘係跟著你後面出去，你掂過嘅地方又唔邊度夠膽再掂，諗起都核突啦，有菌㗎嘛大佬。

你唔好以為麻甩佬先會咁，週時聽D friend 講女廁都係一樣，講真，去廁所唔洗手呢家嘢，生得幾靚都冇用，諗起咩胃口都冇哂。

你隻手要嚟做咩呢?

作者 :Master Loop

平時出入門口，唔知大家有無發現有D友嘅攝功真係好勁，到門得返條門隙都可以攝住入，目的只係為咗慳返D力唔去推門，但好多時佢地為咗咁，撞到人都唔使理，有D仲離譜，等人開埋門比佢攝，男又係咁女嘅又咁。

其實上天比你四肢健全咁生活，你就好似跛咁，不如你斬唒D手手腳腳將自己放入個缸到住咪得囉，反正你都唔用。

CEO birthday party

作者 :Master Loop

臨近放工HR出咗個email invitation，話CEO 生日，邀請大家幫佢慶祝，個party 半個鐘，lunch time，既然大老闆birthday party，大家豈敢唔去。

HR出完個invitation 之後，好快又出咗個email，叫大家夾錢買蛋糕、夾下個rundown 幾時唱生日歌同齊心講聲生日快樂，大家睇到呢到真係想噴飯，咁都得？！但係，冇得揀....

如是者到咗當日，HR準備花、生日蛋糕、食物、香檳同大家簽咗名加一句唔可以唔寫的祝福語的大大張生日卡，當然全部係我地夾錢。HR一聲令下，大家齊齊高歌生日歌，半個鐘的生日party就咁完咗。

真心講，擦鞋嘅嘢真係間間公司都有，但呢穫真係極品，如果大老闆係得民心，根本唔使做呢D咁無聊嘅嘢大家都會同老細講句生日快樂，使乜好似北韓咁迫人做，真係多舊魚。

病假要影相證明?!

作者: Master Loop

一早收到同事通知，話尋晚踢波抝柴今日返唔到公，通常呢D case，覆聲同事Ok 叫聲佢保重就算。

返到公司出個email 通知大家同事病咗返唔到工，老細一睇完叫咗我入房，問我有冇問同事攞張相，我話咩相。老細話同事拗柴要影張相證明佢係拗柴，唔係講就得，我話有醫生紙咪得，點可以叫同事影相，嚴重侵犯私隠喎，我就唔會問，你自己可以堅持做。

過咗一陣，老細走去我度show 張相比我睇，我望一望係隻包咗沙布嘅腳，原來條八婆真係問同事攞幅相，老細仲同我講：「點會侵犯私隱吖，同事一問就比，做management 唔可以咁畏首畏尾」。我心諗同事費事煩先影比你，你以為做management 真係可以為所欲為咩，低B。

帶headphone啦唔該！

作者 :Master Loop

香港地D人都好得意，中意打機、睇片唔戴headphone，仲要開到個speaker 大大聲，大人係咁，佢教D細路都係咁Q樣，其實買個headphone 幾錢呀，可唔可以比D公德心呢？！

一早搭巴士返工，個個諗住瞓吓抖吓，你就要全部人陪你睇劇集，去到cafe，想安安靜靜食餐飯傾吓計，你隔離條靚仔就喺度睇卡通片，生個仔又唔湊，淨係比部ipad佢睇片，唔計嘈到人都對條靚仔唔健康啦，但係D港爸港媽實話公眾場所唔用headphone 都唔關人事，掉返轉你試吓我開條片睇女，就算唔係三級色情片都會有人道德判官上身小我，話教壞細路呀、影響社會風氣咁，所以，唒氣，呢D自私嘅行為係唔會有改善，無進步！

祝你身體健康(六) - 復工了

作者: Master Loop

Emma終於復工啦，一返到公司佢就拿拿聲填好哂 D leave application form，等老細返嚟就交比老細，佢順便仲打埋封辭職信。

老細準時九點鐘蒲頭，Emma拎埋D嘢入老細房，老細第一句話：「點呀，你OK嘛，可唔可以睇吓個傷口？」Emma當時呆一呆，咁似巡房醫生講嘢嘅，不過心諗自己又唔係扮病，咪戇居居照比老細睇吓個傷口囉，睇完都未夠皮，老細跟手又問：「你個手術係點嫁，打完麻醉藥之後又點呀？」一連串九唔搭八的問題，Emma為免老細繼續炮轟佢，於是同老細講：「呢封係我辭職信」，老細定一定神然後問Emma 有無得可以傾吓，Emma好決絕咁say no，話以宜家個medical condition，真係想take個break抖吓，老細又問係唔係因為做完手術mental有D問題，佢咁講咪即係強加D唔適合返工的理由比Emma然後唔使比通知期的糧叫Emma即走，Emma話唔關事，真係想抖抖，老細話咁好啦。

過咗半個鐘，HR 又走去搵Emma，話想傾兩句。

Emma入到去HR房，HR第一句話：「你封辭職信個last day寫錯咗，今日27號，你last day應該你下個月26號先啱，況且27號係星期六，你改返佢」，Emma同HR解釋之所以咁寫唔係唔識英文，係有D公司係唔計遞信嗰日做通知期第一日，為免有爭拗先咁寫」。之後HR答得仲攪笑：「我地大公司唔會咁計，你唔好誤會公司cheap唔想比多日人工你，其實比多日人工比你又有幾多吖」。

Emma同HR講：「我唔知道公司點睇嗰一日糧，如果公司係咁計，無問題，麻煩你出返個email比我，我改返信上面個last day，因為我唔想將來有爭拗。」

呢個你一言我一語的對話足足講咗成粒鐘，最後HR只拋下一句：「我地會再confirm你個last day，我地開會傾下先，睇吓可唔可以比埋嗰日你。」

講咗成粒鐘，真係哂Q氣，HR以為公司係上市公司咁大，咩都係施捨比員工。

呢D HR咪有問題囉，成日諗住D員工要份reference letter，於是做嘢有幾盡就去到幾盡，因為員工實唔夠膽反抗，不過呢個世界係有報應嘅，做人去到咁盡，等天收啦！

冷知識

唔講可能你唔知，小編初出道時，做過間公司真係唔當遞信嗰日做通知期第一日，employee handbook 真係寫明要clear month，所以大家真係要小心睇清楚公司係邊樣，小編就係因為睇漏眼，白白唔見咗日人工。