新老細 - call Uber

作者: Master Loop

上次都未講完大師兄的故事。

亞Sam話有次新老細叫大師兄幫佢call架Uber去客到，因為年紀大唔識用call車app，老細叫到，咪照做囉，反正之後可以claim返錢，點知架車到咗，新老細同大師兄講話突然間想搭地鐵，cancel間車啦，大帥兄話cancel唔到，間車到咗，老細話：「乜你咁Q蠢，都話唔搭，仲問，你有無腦嫁!」。

大師兄好無奈咁走咗落留下同Uber司機講話取消個order，順手比返幾十蚊司機，畢竟係用自己個account call 車，費事比人整衰個rating啦。亞Sam話呢D情況並唔係發生一次，係見過好幾鑊，真係無貼錢打工兼買難受。

D同事私底下問大師兄點解唔炒老細魷魚，大師兄話費事份CV花哂，除非真係忍唔到。

差不多到probation完，老細同大師兄講：「宜家有兩條路比你揀，一係你自己辭職，一係我炒你」。嗰日之後，亞Sam就再無見過大師兄喇。

其實打工仔最怕就真係份CV花哂，老實講，自己有時收到candidate份CV如果太jumpy都真係未必會揀，除非真係無乜CV入嚟。所以如果真係好唔啱做，寧願立定決心喺probation裏面走人，唔寫落CV，好過做咗半年先走人，到時寫又唔係，唔寫又唔係。

祝你身體健康(五) - 沒完沒了的故事......

作者: Master Loop

究竟一間公司可以對一個員工欺壓到幾盡，睇Emma個例子就略知一二。

Emma喺休養期間又收到公司電話，今次係HR。HR同Emma講話要佢即刻email個病假紙比佢，如果唔係就要扣起佢呢段病假的糧，因為會assume Emma 係放緊 no paid leave，Emma話 no paid leave 係要預先批先可以放，公司點可以立亂當人放no paid leave而扣人D糧呢? 但HR話呢個做法係合勞工法例，同埋復工之後會比返D糧，Emma話點解公司突然有呢D要求，HR只係keep住講要病假紙，Emma忍唔住同HR講：「我線都未拆，公司第一句唔係問候吓個員工身體如何，而係竟然第一句係同同事講要扣糧，呢間係咩公司」，HR條西婆只keep住重覆住同一番說話，Emma於是同HR send個email 然後再跟進。

如是者等咗大半日HR都無send email 比Emma，於是Emma唯有主動send D 病假紙比HR，HR當然亦無回覆，直至Emma 好鄭重咁再出email話已滿足要求，公司再有扣糧的情況已屬違法，HR先死死地氣用email回覆話收到，但再無提扣唔扣糧的安排。

其實Emma已經預咗復工之後就辭職，只不過想休養好先返公司處理啫。我做咗嘢咁多年，衰嘅公司真係聽唔少、見唔少，不過去到咁盡、咁仆街都真係好少見，其實公司管理層以為咁做係好勁，胡亂搵同事欺凌，但佢地忘記咗請人都要講公司口碑，同埋呢個世界係有報應，正所謂「若然未報，時辰未到」。最後，唔係性別歧視，Emma嘅上司、大老細同HR嗰D全部都係女人，所以話，有得揀都唔跟女人做嘢。

冷知識

幫Emma問過勞工處，原來勞工法例真係容許公司扣住D糧先，等有病假紙先至比返個員工，嘩，香港D法例幾落後。再問平機會有關殘疾歧視條例，佢話要等Emma比公司炒Q咗先可以搵平機會幫手。最後，只好提吓Emma記錄好同公司的對話，保障自己，而我亦幫Emma約咗個免費法律諮詢服務，希望Emma可以多D保障。

新老細 - 買飯盒

作者: Master Loop

終於都到Happy Friday，亞Sam問我今晚有無興趣Happy Hour，都好，反正無著落。

去到酒bar坐低，亞Sam話近排好大鑊，換咗個新老細，我問男定女先，佢話係男嘅，我話咁都好吖，男人衰極有個譜，點知亞Sam話呢個唔同喇，新老細係個上咗年紀的臭品男人，喺行頭做咗成四十年，經驗係好夠，但D人品就...佢舉咗唔少例子比我聽。

話說新老細嚟咗之後諗住expand條team，近排請個肥仔返工，因為身形關係，老細已經起咗個花名比新同事 - 『大師兄』。亞Sam話大師兄嘅遭遇簡直係慘絕人寰。佢一到埗，基本上老細就當咗佢係亞四，有次lunch老細叫大師兄幫佢買盒飯，大師兄落到去茶餐廳買咗個午餐包飲品，買之前大師兄已經問清楚老細食乜飲乜，點知返到去老細喺大庭廣眾問「點解唔加個例湯比我，明知我鍾意飲湯嫁嘛，你咁X蠢嫁，你亞媽生到你咁肥咁樣衰，你老豆老母實一樣咁衰相」 ，大師兄當時無啦啦比人小完，真係咩癮都無哂，畢竟lunch都仲有好多同事喺位食飯，仲要連老豆老母都比人鬧埋，都未開口問老細收錢，老細又話「你仲企響到仲乜，唔X係仲諗住問我攞返錢呀?」可憐嘅大師兄唯有攞埋自己盒飯入pantry食。

亞Sam話當時個個見到大師兄咁都覺得佢慘，不過除咗心表同情之外，真係無咩可以做到，只求自己唔好係下一個。聽到呢度，真係一山還有一山高，一時之間都好難講邊個老細衰D，畢竟都唔係出嚟鬥衰，唉，一樣米養百樣人。

職場打不死 之『擦鞋仔』

作者: Master Loop

『擦鞋仔』呢三個字，簡直令人聞風喪膽，佢仲勁過鬼魂，無論你時運高同低都會比你撞到，佢地生命力勁過小強，只要邊度有食搵，你就會見到佢嘅踪影，可以話係職場打不死。

其實擦鞋仔之所以能夠長存，都係多得D極級廢柴老細的存在，正所謂有咁嘅需求先有咁嘅的供應，相信大家用十日十夜都講唔哂擦鞋仔的行為，之但係如果你的下屬係一個極品擦鞋仔，但唔係擦你鞋，而係擦得掂你上面嗰個極級廢柴老細，情況又會係點呢?

Manny喺我入職時已經喺度做的下屬，佢工作能力係零、樣貌係零、工作態度係零、責任感係零，基本上可以講得上係廢柴一名，但係.....佢四年內升過兩次職，喺職場上算係唔錯的成績，咁點解呢?

Manny喺英國讀完書返嚟，呢個亦係佢經常掛喺嘴邊的自我介紹，佢話小五去咗讀書，唔係好識中文，基本上係一個鬼仔，所以要review中文的document可以唔使預佢，我心諗你小五先過去，你唔識中文，咪玩啦。唔單止咁，Manny話佢腸胃唔好，一年總有幾次會有腸胃炎，要請病假，所以單聲比我知先，佢又話由於佢腸胃唔好，朝朝返嚟都要去痾屎，所以朝早唔係位好正常。佢又話老闆好睇佢，所以升職機會多過其他人，而最重要嘅係佢生得靚仔，所以成日比公司女同事性騷擾。

接手咗條team一段日子，發覺Manny除咗識擦鞋同同女同事緊密溝通次外，佢根本上係乜都唔識，見客D appointment係流嘅、自稱近乎native的英文grammer係錯嘅、踢完英超、西甲第二朝例病嘅，佢最叻就係同女同事玩『三吋長』，大家唔好心邪，意思係話佢每次同親女同事講嘢都只會距離對方三吋嘅面對面接觸，而佢所謂朝朝有屎痾的習慣原來係落咗留下食早餐，而呢個並唔係祕密，因為幾乎人人都知。

觀察完一輪，我寫咗個proposal 比老細，其中一樣係要整頓吓條team，而Manny係唔可以再留低。老細睇完個proposal基本上無咩異議，唯獨是Manny要特別處理，佢話Manny要氹，唔鬧得，試吓比個人佢帶，我話幾乎盲嘅都見到佢吞卜喎，公司時間去咗食早餐已經講唔過，仲比人佢帶? 咁點服眾呀?!

老細話要令Manny無得去食早餐其實好簡單，叫我朝朝九點早會，咁同事咪無得落留下囉，我話佢開完會食咪一樣，同埋你家吓罰佢定罰我呢? 你估我真係無嘢做咩? 老細又話不如比flexible working hour 同事，等佢痾完屎先開工，我話咁都得?如果痾屎係申請flexi hour 嘅原因，咁仲成世界嘅，成條team點管呀! 再加上亞老細你話我地department 係唔可以有flexible working hour 的安排喎，但老細竟然話而家Manny有生理需要吖嘛，咪就吓囉。

打咁多年工，擦鞋仔見得多，廢柴老細亦見唔少，但包庇到呢個程度，真係連痾篤屎都話啱嘅，就真無聞所未聞，聽所未聽，對於我嚟講，呢個headcount等於廢咗，講完。

試用期，你過到未?

作者: Master Loop

幾經思量之後，唯有硬住頭皮做次衰人同同事講要extend佢個probation，同事聽完之後面色一沉話『明白，唯有再盡力做好D』，佢補多句話其實知道係我上面嗰個要extend佢個probation，知道唔關我事，原來極權世界下，並唔係個個都係無思想嘅。

晏晝老細又叫咗我入房問同同事傾成點，我話照你意思同同事講extend佢個probation，老細問同事有咩反應，我話唔開心梗有，但話會盡力做好D。老細聽完的反應係『Good! 同事話會盡力做好D，咁即係知醜、知衰，咁做啱嫁喇，如果比其他人知佢要extend probation咁仲好，因為佢會再努力D做嘢，你知唔知你extend 新同事probation件事連HR都覺得好震憾，因為從來無人試過，做得好!』我心諗係你條八婆extend，唔係我呀。我話其實出面Manny個grade又高過新同事，能力同新同事一樣，但係都照响度有職升、年年分幾個月bonus，其實真係唔係好公平，點知老細話『人哋點同呀，人哋識做project呀，呢個同事識唔識吖？』。我心諗嗰D叫做project?! 條擦鞋仔只係坐响個會度做聾啞人仕，事後大大聲話比人聽佢開Q完會，最緊要佢舌功了得，舔得掂你條八婆對鞋。去到呢到我根本就唔想再同老細講任何嘢，因為佢的心理唔平衡已經到達咗頂峰。

差不多放工的時候，老細叫我叫埋新同事入佢房，我地兩條友入到去，老細問新同事『你大概都了解你要extend probation的原因，其實你真係做得好好，只係有D地方我想你再改好D，咁就perfect喇，比心機呀!』，同事只好搭句知道，然後同我戇居居行返出去做嘢。

五點半，新同事準時熄機走人，正常嘅，比我係佢，真係要攝高枕頭諗清楚第二朝仲應唔應該返工。

People Empowerment - 老細你識解咩?

作者: Master Loop

早派公司安排上training，內容係講People Empowerment，當其時一睇到個topic，真係咇一聲笑咗出嚟，唔係因為我上得太多呢類型的training而覺得悶、亦唔係因為唔認同呢個topic，只係因為呢間公司由CEO開始都唔知咩叫做People Empowerment。

舉個簡單的例子，小編早排請咗個廿幾歲的後生仔返嚟幫手，雖然佢並唔係嗰種勤奮上進型、接收能力亦唔算強，但以佢嗰個人工差不多啦。好快過咗三個月又係時候同新同事做probation review，基本上同事無咩特別過錯，算係合格我都會比佢過probation，當然我亦會提吓同事可以改進的地方。如是者，我就將approve咗同事過probation張form交咗比HR。

點知過兩日，HR同我講話我老細有D concern，我話我打咗工咁多年，基本上就算以前做緊SM個grade都已經有authority批同事過probation，HR話呢度其他department都係，唯獨是我地的department有D唔同。

我攞住張form走入房問老細點解我無authority批同事的probation，同埋同事有咩致命原因要extend人地個probation，老細話我絕對可以比同事過probation，之但係 blah blah blah.....而最重要嘅係老細覺得同事喺team lunch的時候表現太靜，唔夠活躍，我心認宜家請隻鴨陪坐咩? 我同老細講我並唔認同咁小事就要extend同事個probation，因為係人都知你一extend得同事的probation，就等於叫人過主。老細問我同事係咪滿分，我心諗『你都多舊魚，莫非你自己滿分?，如果條友咁勁就唔會嚟呢間公司啦，係人都知我地公司個HR head出名㩒人價，係我咁L蠢先比你地個title坤Q咗入嚟啫』，老細繼續講話唔可以咁容易比人過probation，一定要比D hard time新人，就係咁，老細叫我填過將form，但最仆街嘅係老細叫我同同事講係我唔比佢過probation，呢吓真係能吊吖嘛!

所以話上乜Q People Empowerment 的堂吖，喺度做嘢好似去L咗北韓咁，就嚟痾屎痾尿都要入form，大家咪以為小編去咗SME打工，我份份工都係喺誇國公司做，問題係出喺management身上，而呢個故事仲有後續嫁.....

待續...

揸車見聞錄：乘客

Written by: Madboy

講完停車場終於揸車出發啦！噢sorry未得未得，先講講乘客 manner。

坐人車，吾好一支箭咁衝入後座，上番來前面吾該，我吾係Uber (先旨聲明，Uber冇吾妥，不過家陣係courtesy，吾係搵食嘛)。吾好用盡全力閂門，我吾洗你幫我做撞擊測試。亦吾好睇都吾睇兜嘢開門，我最憎開門L (前文已經講解過)。上到車吾好搞人地個冷氣設定 (當然吹到你飛起就例外啦)，由其咪搞機頭！聽咩歌(定吾聽)、開幾大聲係駕駛者與生俱來，神聖不可侵犯的絕對權利。「阿邊個邊個部大D舒服D喎...」，咁啱啦！請你過去坐阿邊個邊個嗰部啦。吾好俾太多駕駛同搵路既意見，除非揸嗰個開口話吾識路啦。

至於駕駛者方面，冇計啦，就吓乘客，收起D激情，揸慢少少，吾好盡劈囉😅。

待續⋯


 

祝你身體健康(四) - 真係最終章??

作者: Master Loop

小編以為Emma個故事終於可以落幕，點知原來仲有後續。

Emma又收到唔同人的WhatsApp，今次人才鼎盛喇，有自己teammate、有Legal team、有自己老細，但大家的WhatsApp內容竟然都係問同一個問題，就係叫Emma send返個proposal出嚟，之但係個email已經喺幾個月前send咗比老細，點解特登喺人地休養緊的時候又問呢？

Emma見都係搵返個email啫，幫吓手費事其他同事難做，亦順便問Legal知唔知佢其實放緊病假，CEO同老細根本唔應該搵佢，Legal話CEO只係同佢講你放緊大假，完全唔知道你原來係on sick leave，跟住佢講咗句sorry話唔會再搵Emma然後就收咗線。

縱觀成件事，CEO都好有問題。首先，CEO誤導Legal同事話Emma只係放緊大假，等搵Emma的同事唔知道自己係騷擾緊放病假的同事，呢個係一 仆街。第二仆街嘅係CEO只係老點其他同事騷擾Emma，全部都無black and white證明係自己叫，有咩事投訴到平機會同勞工處都無證無據證明個CEO有咩行差踏錯，呢個CEO真係衰到無倫。

或者大家覺得CEO真係做咩都得，其實呢個觀念係錯嫁。如果喺大公司又甚至乎係喺跨國公司做過，咁你就會知道公司係有規有矩，就算係CEO都要遵守遊戲規則，唔係好似Emma公司個CEO咁，仲停留緊run間廠咁，簡直係井底之蛙，不知所謂。

揸車見聞錄：停車場（二）

Written by: Madboy

話說上回提到泊車同開門L，其實停車場仲有其他麻Q煩行為：

停車L

咪誤會呀！吾係吾俾人停車，而係喺邊度停同點解要停。講到呢度，又不得不提自私大支嘢八婆港婦啦，最Q鍾意「楝」正係車場𨋢口有冷氣嗰個位到(其實已經阻住其他人出入𨋢)，然後命令佢個港男老公去攞車，揸架車過來 pickup 佢。本來吾關我事，但係𨋢口出嚟個條路只係夠一架車闊，你停Q咗喺度其他車過吾到就關我事啦！仆你個街佢仲吾係咋咋淋爽D手，而係以為自己係闊太去中環 high tea 咁慢條斯理、走完去嗰邊擺低D shopping、又走返嚟呢邊氹佢個冇家敎頑童細路上車，「BB，你咁吾得㗎，咪naughty囉！快D上車扣翻條 seat belt啦⋯」。如果你得番五分鐘就要扣下一個鐘錢你真係想比條命佢！你喺後面等，佢丁點唔好意思都冇，仲擺起副死人西面睥過嚟添！吾單止 pickup, dropoff 都一樣普遍，其實、大肚婆、手抱BB、老弱傷殘就話啫，冇事冇幹洗乜咁大支嘢呀，一家大細去攞車，沿途睇吓人地架車咪幾好？

逆行L

入到停車場好多人都好似去咗無人地帶咁，將所有交通規則拋諸腦後，一於放任式我行我素！本來只要注意安全、係無傷大雅嘅。但係行車方向則較為重要，因為停車場一般多柱，又窄又多盲位，如果亂咁逆行其實都幾危險。況且有時個場已經冇乜位淨，個個順行搵位，如果突然有條仆街「爆油」一支箭咁逆行去殺咗個位，咪等於打尖？講真，逆行三幾個車位為泊車就話家家有求啫，你逆行成條街咁滯、好啦都冇所謂啦 (話哂呢度吾係小學，唔使好似小息打鈴鐘咁，跑緊都要即刻定格咁守規矩)，但係有對頭車嗰陣，你都吾好老L馮，仲 expect 我蹆後俾你吓？

待續⋯

1:1 Meeting

作者: Master Loop

經過無數次ignore老細喺放假send比我的WhatsApp同電話，老細終於出招。

返到公司籮柚到未坐落張凳，老細就以無聲的腳步飄去我身邊話去佢間房傾D嘢，佢一閂親門就知道無好嘢。佢叫我update吓手頭的工作進度，跟住正題就嚟喇。老細話佢每日D會都好多好密，加上又要週圍飛，所以想將weekly 1:1 Meeting喺星期六開，我話星期六放假有自己嘢做喎，老細話『我知，但如果有得揀我都唔想，不過我D schedule 真係太密』，我一句都無應過老細，心諗根本係你自己time management 有問題，就搵D細的嘅嚟攪。

開完會，我走出去問同事老細有無叫佢地係星期六開1:1 Meeting，佢地話唔L係呀，星期六開會咪成日比Q哂佢，到時老細叫咪同佢講話逢禮拜六、日都返大陸，唔喺香港。吊，心諗今次真係笨實，唔用呢個藉口，唉，唯有到時見步行步。

其實打工遇著個心理變態的上司，你真係無咩嘢可以做，一係劈炮唔撈，一係死頂，喺老細惡過打工仔的年頭下，唯有死頂住先。若然老細有返兩分姿色都仲話養吓眼等個心好過D，之但係眼前嗰個係個半百人瑞，皮膚好似肓公陳個金錢龜殻咁，仲要對住你騷手弄姿，真係食幾多XP都保唔返。

心理變態是如何鍊成的?

作者: Master Loop

年過半百的女上司週圍同人講話老公好𡃶自己，所有家頭細務老公做哂，自己連洗衣機、電飯煲都唔識用，老公又係運動健將，有時間就會一齊跑吓步，照咁睇，佢真係一個幸福的女人，又搵到錢又有老公𡃶，但點解會係心理變態呢?

佢係公司做咗十九幾年，有CEO包庇，唔識英文但竟然可以坐上regional個位(唔係刻薄，佢真係唔Q識英文)，點解仲要心理不平衡呢?

佢被CEO包庇的程度已經去到令人髮指的地步，幾乎佢放篤屁都係香嘅，大家唔好誤會，CEO並唔係唾涎佢嘅美色，因為CEO都係一個C9，所以更令大家摸不著頭腦，點都好，咁一帆風順，何解日日虐待同事呢?

記得onboard無耐，老細叫咗我入房，話喺公司唔使做好人，因為做好人係無好下場，越叻的人就會越多人妒忌，當時無咩在意佢講乜春，宜家諗返起就知道佢原來係心理不平衡。

點都好，跟住一個心理不平衡的老細真係命都短幾年，半夜痌夜尿嗰陣都浮現老細個樣出嚟，唉，搵食就是如此⋯⋯

揸車見聞錄：停車場（一）

Written by: Madboy

咪以為各式衰格嘢淨係出現喺馬路，其實於停車場一樣常見。試試逐一講講：

泊車L

基本上係吾Q理客觀環境，亦無視個位畫成點，一於鐘意點泊就點泊。大細邊、斜、責界甚至衰到出哂個格度一車霸兩位都碰不罕見。其實稍有駕駛常識常同知道規矩嘅都明白同鄰車的距離主要係考慮司機位可以方便上落。所以通常柱位大家都會自動自覺泊埋柱邊等大家都多D位開門，吾洗做開門L (容後詳談)。但係有D友係都要泊離條柱，貼正隔離位，攪到門罅都幾乎吾夠開，仆佢個街差D要天窗出入！你話司機位貼柱或貼牆開吾到門要留番多D就話啫，但好多時係留乘客位俾個自私大支嘢八婆港婦施施然上落㗎喎!!!

開門L

即係開門完全吾Q理隔離有幾多位一嘢轟出去。嘭一聲之後，人地度車門就多L謝晒啦，小則花、大則凹。相信大部分人車身都有吾少呢D傷痕，其肉赤不用多講啦。一般呢講，開門L不一定係泊車L (因為好多時係乘客)，但係泊車L就幾乎肯定同時兼任開門L，連泊車都吾識得就吓人、諗吓人，咁又點會開門個陣驚整凹你架車呀？

待續⋯

奪命追魂call

作者: Master Loop

長假期又過去，又要返去個煉獄到捱騾仔，返到公司，同事Benny問我老細過去嗰幾日有無WhatsApp搵我，我話熄咗個電話所以唔知喎，Benny話老細又WhatsApp又email比佢，唔係交帶嘢比佢做，就係鏟佢話佢廢，我問Benny仲咩你放假仲應酬佢，佢已經唔係第一次，佢咁樣只會有恃無恐。

記得初初入嚟做，老細日日夜夜奪命追魂call，真係打到你聽佢電話為止，一開始就WhatsApp你問你有無時間講兩句，話好快，心諗星期六搵得我梗係有D急事，於是唔知頭唔知路就聽咗佢電話，一講就無Q咗兩個鐘，舔咗幾穫之後我就決定放假唔再聽老細電話。

星期六、日、公眾假期其實係比打工仔離開吓個工作崗位抖吓氣，如果放假都幫公司做埋嘢，咁麻煩公司你出返多D糧比我，但我仲要諗吓做唔做。老細放假order人做嘢以為係事業強人的表現，其實係你戇九，唔Q delicate D嘢比下面做，做唔切就放假叫埋D o靚同你一齊OT，以為咁好型。有責任心係好，但如果遇著個老馮老細，聽電話前真係要諗清諗楚。

Team Gathering

作者: Master Loop

老細話想星期六攪gathering，等D同事聯誼吓，佢問同事想攪咩活動，同事一致認為BBQ最好，心諗唔使同老細咁多交流。有同事因為要湊小朋友問老細可唔可以唔去，老細話『呢個係公司event，公司比錢，只有紅白二事先可以唔去!』嘩，呢個世界有無D咁mean的老細呀，星期六係私人時間，去就人情，唔去就道理，公司比錢大哂咩，不過大家睇在份工份上，唯有焗住去。

去完BBQ之後，大家諗住有排都唔使去下次，點知老細話意猶未盡，要攪多次，佢話今次攪Happy Hour，五點開始去到六點半，由於係喺office hour內，大家唔可以唔去。有同事又問老細可唔可以早D走，因為要趕住返屋企湊小朋友，老細話『呢個係公司event，公司比錢，只有紅白二事先可以唔去!』

其實team gathering的原意係好，仲記得以前舊公司，所有同事上下一心，去所有gathering都好樂意，點似得呢間公司咁，要迫人去之餘，仲要咁mean話有紅白二事先可以唔去，如果要用強權先叫得郁同事去玩，咁不如唔好攪，個個去度都係望住隻錶等夠鐘，咁又何必呢？

客席寫手 - 講車...

作者：Madboy

首先好多謝亦好榮幸收到阿 Master Loop 邀請，為佢呢個 blog 寫番D關於揸車既見聞。當然，為咗秉承佢嘅一貫作風，梗係要將D乞人憎既行為大「跳」而特「跳」啦! 

嚟緊一連數篇關於揸車L嘅 posts 好快會同大家見面啦！

祝你身體健康(三)

作者: Master Loop

話說Emma終於成功做完手術返咗屋企休養，為免比老細追問康復進度，於是send咗個WhatsApp落群組通知老細同teammates自己出咗院同下次覆診時間，當有個交代，諗住做人有D交帶都係好D。

經過一晚的充足睡眠，體力總算回復返D，電話又傳嚟WhatsApp的震聲。Emma攞起電話一睇，原來老細喺群組覆Emma『我尋晚先公幹完返香港，你好好休息吓，抖夠先返工做嘢呀』。Emma當時真係想喊出嚟，因為心諗老細終於識體諒佢喇，點知.....開心永遠唔需要咁早。原來老細呢頭喺群組覆完Emma已經即刻send咗個個人WhatsApp比Emma話『之前你同陳生傾個proposal，你send比佢同cc我』。真係跳九佢露眉，線都未L拆就叫人做嘢?! 係咪忽L咗! 仲要係個proposal已經send咗九千幾年，宜家又問?! 擺明想叫人病假做嘢。既然老細咁唔體諒，分分鐘放完病假比人請食豉椒炒魷，於是同佢老細講『個proposal已經send咗好耐，同埋麻煩尊重一下我宜家係放緊病假，放完病假自然會返公司跟進工作』，當然呢個訊息已被老細已讀不回。

原來老細只不過喺群組到扮好人，費事D細嘅知佢個人衰，呢D老細咪真衰囉，明明尖酸刻薄，又要喺度扮好人，呢D人喺背後比人咀咒都抵。

冷知識

小編就Emma個情況打去平機會同勞工處，勞工處話病假期間僱員係絕對有權拒絕僱主要求工作的指示，但僱主就唔會因為要求僱員病假期間工作而犯勞工法例。而平機會就話要等到僱主真係對Emma採取任何行動而引致Emma有任何利益的損失先可以引用殘疾歧視條例，不過亦提議Emma好好記錄公司同佢的溝通的對話內容，保障自己。

祝你身體健康(二)

作者: Master Loop

Emma 開始倒數入院做手術的日子，而伴隨住Emma 嘅並唔係老細的關心，而係老細不斷增加的工作量，而deadline竟然全部都係佢入院前的日子。雖然Emma深知公司唔能夠喺病假前同病假期間炒佢魷魚，但為免比公司抽抨，唯有盡力完成手頭上所有的工作。

差不多到晚上八點，Emma大致上完成手上的工作，總算對老細有個交代，正當想離開公司之際，老細又叫咗Emma入房，話要review吓Emma所完成的工作。不經不覺時針又去到了十點⋯⋯老細最後一句話就係『你之前幫我做個powerpoint，我太忙未有時間睇，我過幾日睇咗再搵你改』，但其實Emma聽日就已經要入院，咁即係點? Emma鼓起勇氣同老細講話明天其實要入院，幫唔到你跟D野，不過老細好似借咗聾耳陳一樣，只係不斷重複話『得喇，到時我再WhatsApp你啦』，Emma心諗到時先算啦，而家放咗工要緊。

Emma終於完成手術，就喺呢日，佢就收到同事WhatsApp叫佢打比CEO，Emma問CEO搵佢仲咩，同事話唔太清楚，只知道同工事有關，Emma內心真係好Q慶，D麻醉藥都未散哂，公司唔係問候吓個員工，而係叫佢跟公司嘢?! 真係咩料呀! 最後，Emma叫同事轉達呢個口信比CEO，『如果要打比CEO，我要打去勞工處先，問CEO咁安排好唔好』，同事話咁當我搵你唔到算喇。

以Emma的情況睇，好明顯間公司的management有問題，CEO直情當D員工唔係人，中高管理層又點會唔係一樣咁變態吖，係呢D公司打工，你做到仆街係應份，因為出糧比你，你就算幾博都好，只會有辱無榮，呢D公司真係早走早著，遲走瞓唔著。 喺呢度祝Emma早日康復，好好休養，因為公司宜家係唔可以解僱你嫁。

冷知識

如打工仔放緊合乎勞工處所介定的有薪病假，僱主炒你魷魚係犯勞工法嫁，除此之外，僱主亦有可能獨犯殘疾歧視條例，記住隨時都要認清打工仔的權益，唔好比僱主大到你同虐待你。

祝你身體健康(一）

作者: Master Loop

Emma最近身體唔舒服，需要做個小手術，諗住做返個盡責的員工，預早成個月同老細單聲等佢方便安排人手backup，仲send定個email 比老細費時到時佢唔記又比人𡁻，殊不知老細一聲問候都無都不特只，仲出email 比Emma，叫佢問醫生攞張假紙同公司申請病假，仲話你未做滿一年唔entitle to病假。Emma心諗都未做手術，又點預先比張病假紙你條死摌呢?! 滿腔怒火走去勞工處網站睇吓係咪未做滿一年就唔entitle to病假，一睇之下，根本就唔係好似條死摌老細咁講，Emma於是將勞工處網站教僱員如果計算有薪病假的資訊節錄比老細睇，Emma終於可以換取片刻的安寧。

其實無人想病，點解做老細要做到咁賤，家陣有獎嘅咩？係呢到祝呢位老細，以後身體健康，千祈唔好病呀。

冷知識

根據勞工處網站所載，每一個月就可以有兩日有薪病假，最多可以儲我120日，當然每間公司嘅處理方法都有唔同，所以睇勞工處網站之餘，同時都要睇下公司本handbook點寫，因為勞工法例有薪病假係攞五份四人工，仲要係連續四日病假先至合乎勞工法例的要求，你放兩日病假公司支付百分百人工，其實係公司fringe benefit嚟嫁，所以奉勸打工仔們記得睇清楚自己的權益呀。

耐人尋味

作者: Master Loop

近日公司剛推出一個新產品，CEO話不如同大家慶祝一下，於是喺佢房攞咗支香檳出嚟，話一人飲D高興吓，可能呢個世界真係有神蹟，竟然喺公司可以見證『五餅二魚』的威力，因為一支720ml的香檳竟然可以斟咗17杯出嚟，無錯，係17杯，唔係7杯，大家可以想像下一枝720ml的酒，分咗17杯之後，每人真係只不過得一啖飲。

呢個『五餅二魚』的故事並未係重點，戲肉係我地年過半百的女上司，佢舔完佢嗰杯酒之後，竟然同隔離個男同事講：『我有D醉，我倒埋我嗰D比你吖』。男同事未嚟得切有反應，杯酒就多咗女上司嗰兩啖口水，同事費事得罪老細，唯有舉起隻杯扮飲，諗住則則膊唔多覺，點知老細㩒低同事隻杯，問『你飲哂未呀？仲咩仲唔飲嘅？』。就係咁，男同事唯有舉起隻杯，將老細兩啖口水唸淚飲下，男人之苦，大慨如此.....

下雨天

作者: Master Loop

唔知大家有無留意香港落雨天有一個奇景，就係D人鍾意喺騎樓底擔遮，然後無遮擔嘅人就喺露天地方行住揼雨。其實收咗把遮又有幾咁困難呢? 我呢D乖乖地收遮嗰D就比你呢D自私精把遮滴到濕鬼哂，如果懶得收遮你咪行返出去無額遮頭的地方囉? 香港人幾時先可以學吓唔好咁自私呢? 究竟知唔知騎樓底的作用呢?

冷知識

『騎樓』- 係露臺，向出角位，有柱支撐。騎樓可以幾層樓高。騎樓下面叫騎樓底，通常係街來，可以畀行人遮日擋雨。若可成條街騎樓連成一氣，就好似有蓋走廊咁，咁騎樓底嘅舖，人客買嘢都唔會怕日曬雨淋。

《出自維基百科，自由嘅百科全書》

開工利是

作者：Master Loop

作為打工仔，收開工利是係農曆新年的指定動作，亦係云云做人老細的常識。但我個人就有一個與別不同的收開工利是的經驗，真係聞所未聞，聽所未見，一定要同大家分享一下。

話說農曆年假後的第一個工作天，老細叫哂所有人入房話要派開工利事，大家都好聽話入老細房列陣，諗住攞完封利是咪返出去做嘢，點知老細話『大家新年快樂呀，我宜家派開工利是，你地呢度十個人，呢度有十封利是，入面嘅面額大少不一，有三個獎，頭獎五佰、二獎一佰、三獎五十，其他安慰獎二十，大家快D嚟抽啦』。 當時大家心諗『唔係嘛，派就派開工利是啦，攪咩抽獎呀，攪到大家好似乞衣咁搶你D利是』，抽完都仲未夠喉，仲叫大家『快D拆開睇下邊個中獎?』

其實開工利是都只不過係攞個意頭，但點解做個老細做到咁呢，比咪比囉，攪咁多嘢嚟魚肉D下屬，係咪覺得好威好好玩呢? 最重要係佢縮骨嘛，十幾皮人工一個月，就算每人要派一舊，佢都只係攞一叉嘢出嚟，宜家總共只係攞咗$790($500+$100+$50+($20x7))，仲有得凌辱你班友之餘，又可以慳返D，可樂而不為呢。

序

作者：Master Loop

經過十多年的力爭上游，小編好不容易才可以爬到去管理中層，心諗遇到嘅老細都係高層，應該比我做o靚時遇到嘅更理性更有品，更遵守遊戲規則，點知原來只不過係一班高薪厚職嘅 Seafood 鬼，既然呢個世界係無天理，就將每日遇到千奇百怪嘅事，同大家分享吓，等大家吐吓一肚子的悶鬱!